"Ang Project Sinta ay uminog sa at hinulma ng pamamaalam.

Pamamaalam sa mga una kong binuong pangarap - ang magkaroon ng pamilya na hindi katulad ng meron kami ng mama and mommy ko, kasi mahirap.

Pamamaalam sa pagmamahal na unang niyakap ko - yung hindi kinukuwestiyon, na may stamp ng approval ng nakakarami. 

 Pamamaalam sa pag-ibig na binibigyan ka ng enough safety para makangiti ka sa labas, kahit dinudurog ka sa loob.

Ang Project Sinta ay binuo rin ng kagustuhan na humingi ng kapatawaran. Mama, Mommy, sana mapatawad ninyo po ako, kasi itinago ko kayo, ikinahiya ang realidad natin, at sinubukang burahin ang bawat marka ng kung sino kayo sa identity ko.

Hindi ko na maibabalik ang nakaraan. Pero kaya ko magpaalam sa mali kong gawi at dating pinapaniwalaan.

Ang Project Sinta ay pagsibol rin ng pagtanggap at pagsasalamat. Pagtanggap sa pamilya natin. Pagtanggap sa kung sino ako. At pasasalamat sa pag-aruga at pagmamahal na binigay ninyo sa akin.

Ma, 'my, kung bibigyan ako ng pagkakataon na mabuhay muli at tatanungin ako ng Diyos kung sino at anong klaseng mga magulang ang gugustuhin ko, ang isasagot ko paulit-ulit ay kayo - ang Mommy Tiffany at Mama Taeyeon ko, ang dalawa kong nanay na nagturo sa akin na minsan, ayos lang magpaalam sa kombensyonal na buhay, dahil sa totoo lang, wala naman talagang conventions at limitasyon ang pamilya na tunay — at ang pagmamahal na totoo."