Ipinilit talaga nila kay Genesis na ngayong araw rin sila bi-biyahe kahit na dapit-hapon na sila nakaalis sa Trancoville. Dalawa naman daw kasi silang sanay magmaneho kaya walang kaso kung gabihin man sila sa daan.

“Anong gabihin?! Gabi na talaga, uumagahin na kayo n’yan.” Sasang-ayon na nga sana si Kali ngunit ayaw siyang pasingitin ni Akira; kaya ito sila ngayon, nakaparada sa gilid ng talampas. Katatapos lang nilang maghapunan sa kalapit na kainang lutong-bahay.

Sabi kasi ni Kali, ganito ang tamang paraan para maramdaman ang essence ng lugar. Kumbaga, makihalubilo ka sa mga taga-rito, tikman mo ang mga putahe nila, at sakyan mo ang trip nila sa buhay.

Nakaupo sila sa trunk ng sasakyan, humihigop ng mainit na kapeng barako habang tinatanaw ang inahunang siyudad. Kanina pa nila pinag-uusapan ang kanya-kanyang lakad noong nakaraang tatlong araw. Kanina pa rin nila hinihimas ang mga namumulang braso mula sa hampas.

Buti na nga lang at hindi katabi ni Akira ang bagong tattoo niyang braso.

Natigil lamang ang mga ito nang may tumawag sa phone ni Akira. Pinabayaan niya muna si Akira sa kavideo-call nito habang abala naman si Kali sa pagkuha ng litrato.

“Tita Aki, who are you with?”

Itinapat ni Akira kay Kali ang camera ng phone, “Kali!”

“Hmm?” binaba nito ang film camera bago lumingon.

Tila nabigla pa nga siya nang umakbay sa kanya si Akira, “This is ate Kali Lopez, Aj. She’s a new friend!”

“Hi ate Kali! You look astig po!” natawa naman si Kali sa sinabi ng bata.

“Hi Aj! Your speaking voice sounds so good, baby.”

Narinig ng dalawang binibini ang mahinhing pagtawa ng bata, “Tita Aki!”

“Yes, Aj?”

“Will ate Kali be your pasalubong for me also?” tuloy-tuloy ang pagkurap nito na tila ba ay nagpapaamo.